ಪ್ರೀತಿಸುವುದಾದರೆ

Share

ಪ್ರೀತಿಸುವುದಾದರೆ
ಅಸ್ತ್ರಗಳನು ಕೆಳಗಿಟ್ಟು ಬಿಡು ಪ್ರೀತಿಸುವುದಾದರೆ
ದ್ವೇಷವನು ಮರೆತು ಬಿಡು ಪ್ರೀತಿಸುವುದಾದರೆ

ಎಷ್ಟೊಂದು ಲೆಕ್ಕಿಸುವೆ ಕೂಡಿಸು ಗುಣಿಸು ಆದರೆ
ಭಾಗಿಸುವುದು ಬಿಟ್ಟು ಬಿಡು ಪ್ರೀತಿಸುವುದಾದರೆ

ಯಾವುದು ನಿನ್ನದಲ್ಲವಾದರೆ ಯಾಕೀ ಬಿಗುಮಾನ
ನನ್ನದೆನುವುದನು ಬಿಡು ಪ್ರೀತಿಸುವುದಾದರೆ

ಕೊಟ್ಟಿದ್ದು ಕೆಡಲಿಲ್ಲ ಕಟ್ಟಿಡಲಾಗಿದೆ ಕಾಣೋ
ಹೋಗಿದ್ದು ಹೋಗಲು ಬಿಡು ಪ್ರೀತಿಸುವುದಾದರೆ

ಯುದ್ಧವೇ ಇಲ್ಲ ಬಿಡು ನಿನ್ನ ನೀನು ಗೆದ್ದ ಮೇಲೆ
ಸೋಲನು ಬರಲು ಬಿಡು ಪ್ರೀತಿಸುವುದಾದರೆ

• ಉಮರ್ ದೇವರಮನಿ